BITNA SUANGPI -G.Swan Za Lian


“ U Lian, mipi tampi in ong bohhuan uh a, kei kia ong suakta thei zenzen ing. Bang cih ding I hi ta hiam?, “Kap, nang kia suakta maw, lawm dangte bang ci uh?”,”Ki thei lo, kuamah dang suaktalo kei cih loh!!!”

January 30,2016 zing nai 6:00 , ZCF Mission board makaihna a Rajasthan Mission Field veh ding in mi 9(Rev. LT Lianzaw, Rev.J.K.lun, Tual Za Kam, Nang Lian Kham, Kamlianlal, Mangzasuan, Jacob Kappu, Feli leh Mawii) Delhi a patin kipan khia uh hi. Sun nung dak 2:00 lak in a tun na uah kihah siangin, Sadararsaher khua a pat a km 2 khong a gamla Christian thak omna khua a Missionary te (Kuldip te nupa) makaih in va pai uh hi. A van puak te uh piakna leh thumna hun zang uhi. Tua khit in Sadarsaher khua ong zuan in, mi damlo(a zeng) khat a ding in thumsakna nei uh a, tua khit ciangin, thumna lunggulh a vengte uh inn nih a hoh in thungetsakna nei uh hi. Tua a zeng nu, thu a ngetsak lai un pasal khat in lim(photo) a na la den hi. Thumna neikhit ciangun, Missionary te inn a pai ding a, a pusuah uh leh, mi tampi in a na ngak uh a, thu dawtna Rev. LT Lianzaw a na nei uh a,kihotam manlo in vuak kipanpah uh hi.

Mi lah ong tam deuh deuh in, a kua peuh in a tung uah khut ong khak ciangin, numei te bitna ding deih in, a khomite khenkhat in lampi gei a sum buk khat ah lut ding a a sawl uh leh, a sumbuk te a na lau ta uh ahihmanin,lut ana phal kei uh hi. Mipi tam banah, a thom uh lah ngaih deuh deuh , a neu a lian kikai khom in khut kha ding in liiksa ngen in I Mihangsante* lam ngen ah ong taikhawm ta uh hi. Amau zong a hih ding dan om tuan lo anhihman, a kual a kikoi kawm in anunglam uh dawh in numei te a bit theihna ding un, a lai ah a omsak uh hi.

Tua ci bang a vuak thuak ngek ngek in, dakkal nih sung mah mah mipi ten suk-nok, to-nok uh hi. “Jai Sree Ram” ci un, ci in sawl uh a, a gen ut lo ciangun vua zel uhi. A lak ua tangval khat in a vuakna uh na a sak luat manin, “a lungkimna ding uh ahihleh I gen mai ding uh hia,” ci a makaih te a dawt le, “I sih leh Topa min in si zaw di, gen mawng mawng lo di,” ci in ki hasuan uh hi. Tua hun sung mah in, a khangno lam deuh ten numeite pen a group a pat kaih khiat sawm uh a, Pa Tual Kam leh Feli kai khia uh hi. Pa Tual Kam pen dawngkholh sa uh ahihmanun, nakpi tak a a vuak ciangun a khut uh a kikhah khata uh hi. Tangval honin Feli a tuam in a kai khia uh hi!! Nu Mawii ahihleh, pasal te lai ah om a, pek leh suk a thuak lain la nih, “Lord I lift your name on high”, leh “Phat ding na kilawm hi” cih ka lungsim ah om in kasa sa ci hi. Rev. JK Lun in ahihleh, Pasian kiangah kiko khiak leh a vangkim a, a Upa deuh lamte kiangah police sapsak ding a nget hihtheih omsun hi, ci hi.Tua hun sung mah in, Tg. Kappu a sukna u alung am sa a, kun pen mipi nuai a pat paikhia thei kha zen zen in, Delhi lam ong phone thei hi(8:30 p.m.). Ka tate tawh ann ne ding a kisa lai ka hi uh a,tua ci bang thu ka zak ciangun anne thei ka om nawn kei uh hi. Ngahsutna bel saupi pai man hi!!

Bang teng hileh, Pasian min a kuan ahihmanun, Pasian vaihawmna khat om ding hi ciin, vaisai ding dan ngaihsutna kong nei thei hi. Sanggampa Vumlunmang(VLM), phone in, ”Mang, hici bang thu om in, bang hih theih a om ding a?” ciin in ka dong hi. Aman zong a sawtlo in ong dawng non pah in, “Sanggampa Haulianlal,(HLL)IAS, Rajasthan leh U ThangKhanlal Guite, IPS, Rajasthan(Tua Manipur a deputation a om lel lel), ka hilhta” cih 8.38p.m. in ong theisak pah hi. Ka lung ong nuam tuam hi. Tua ciangin, Delhi ah NE Police a Makai Pu Robin Hibu,IPS, Pa Romeo Hmar tungtawn in a thu omdan hilh sak nawn in pan lak theih dan dan in kila hi. Pu Robin Hibu,IPDS in Rajasthan a IGP pa ong na hopih sak hi.

9:35 P.M. in U Vumsuan in hong whatssap a, a, “I Pastors te uh tungtang thu kitelzaw om thei hia, a mun vaphak a kulding leh kei le kiman theiding hi ing” ong ci hi.Lungkham, mangbat lai tak a, hicibang thu hoih I zak bel nak nop tuam lua ahih dan ka cian mah mah hi.Tua khit in ka kiho nawn na uah, “taxi khat la in driver ding 2 leh 3 tawnpih in va pai mai leng, thuak vek ahihmanun, gari bang hek zo lo kha ding uh hi”, ong cih sawn sawn ciangin, a kipiakzawhna thupi sakpetmah in om hi. A Mun a mual leh kimuh na ding koi ah cih khong kithei cian lo ahihmanin, amau tawh ki ho theih dan a om leh kithuza thak ni ka kici uh hi. I Mihangsante un, Police custody a a om khit un a phone teng uh Police ten laksak/kepsak uh ahihmanin kihopih thei nawn lo hi. A phone a lak ma un, Tg. Kappu ka phone kha man nawn a, amah Pa Khampu te police te tawh garite la ding a pai kimu uh a, Khampu in, “ U Lian thungetna ah ong naphawk un”, ci in ong vai khak hi. Tua khit Pa Tual Kam in zong ong phone a, thungetna ah ana phawk ding banah, Police custody a om uh ahihdan ong theisak hi. Liam vek ahihdan uh zong ong gen a ahihangin a na sia lua om lo ahihdan ong gen ciangin kha muangtuam mah mah hi. Thungetna hih thei dan dan in kinei in, a thu theikha a ong phone kha te kiangah thungetna a phawk ding in cialpi na ana ki nei hi.

Feli zong tangval hon kaih khiat a om pen, Pasian in a veng ding a khomi te mah pia mawk in, lamdang tak in kua ma khoih khak hetloh in suakta hi! Thaang(Trap) lauhuaipi ah awk himahleh, Pasian Khasiangtho vangliatna tawh suahtakna ding thu a na ngenden hi. Khut thuak thuak te zong, guh leh tang kitan, kho-phawk lo a puk, liamnak lua a hospital a admit ngai om lo in, mel kimuh theih kik a om pen, Pasian in a tate kem tak tak na ahi. A tate a ding a BITNA SUANGPI ahi dan kician mah mah hi.

Tua ci in, Delhi lam a pat panlak na pen pai to zel in, Mr.HLL in 10:15 P.M. in hicibang thu sanggampa VLL tungtawn in thu ong zasak hi:

“Pa Mang, SP pa toh ka kihou khinchet ua amau adia lauhaui di omkeilungbuai nadi omlou honchi…VHP te tullel inn kong ah protest in om ua, dist administration in khetdaih tumlel…safe passage to Delhi a om thei di, issue hon quiet down zekleh,achi…. Collector has given the same assurance as I know her personally, She has taken direct interest in the matter…chihdan ahi phot.” ci in ong theisak ahihmanin lung ong nuam tuam mah mah hi.

31st January,2016

Mr. Robin Hibu,IPS, North East Cell Delhi in zong 12:11 a.m. in hicibangin theihsakna group tungtawn in ong bawl hi:

“I have spoken to IGP Mr.Rajesh Arya IPS about alleged assault to Manipuri group(Including 3 ladies and 4 gents) by mob at Sadarsaher area of Churu district today afternoon. IGP told me dat Manipur group are safe and they are at police station Sadarsahar, and he has directed SP to take action on merit and IGP will ensure that….”

A tung a, Officer te kammal te tungtawn in nakpi takin tha kingah hi.

1:30 A.M., in naute lum sak in, lupna tung ah Bible sim kawm in thumna nei a ka om leh, phone ong pai in Sanggampa Khakhai Zou, in Sadarsaher Police Station a SHO ka na hopih hin, “bang mah lungkham ding om kei, Hotel a tawldm ding in ka paisak ta uh”, hong cih ciangin police station/lock-up a giak lo a, tawldam zekthei ding uh cih zak ciangin nuam tuam mah mah hi.

2:15 a.m. in tua cibang a thungen a ka om lai in, phone Nu Maman Suante a pat in ong pai a, a U Kham,phone ding in ong gen hi. Ka call ciangin, Khampu Suante, Vice Chairman, ZCF Mission Board in ana la in, “Ka maban uh sah tuak mah mah ve aw” ong cih khit ciangin, Rev. LT a phone pia in ka kiho uh hi. Amau, High level a release process pailel lel ahibanah bit tak a ong pai thei ding ahih dan SP leh DC nu’n assurance ong piak lam thei lo uh ahihmanin, mangbang mah mah uh ahihdan ong gen hi. Zingcianga Police Station a statement khat khat a pe ding ahihdan uh ong hilh a, lungkia lo a thungetna mah ana hah kat ding in ka ki khamuan uh hi. Hilama, development te zong ka hilh a, a lung uh nuamsak tuam ding in um ing. Tuabanah, a poimawh leh gari hekthei 3 leh 4 (including U Vumsuan) va pai ka ut dan uh ka gen ciangin, mi kitam sem leh buaina lian sem thei lai ahihmanin nong pailoh uh hoihzaw ding hi ong cih ciangin tuacibang ngaihsutna pen kikhol bawl thak hi. Tua khit in Feli tawh ong kiho sak a, Feli in “ong lunghimawh kei un,ka hoih uh, a na tawldam sawm un, thungetna ah ong naphawk unla, a diak in Neelam(missionary pa zi- nau pai lai ahih manin)” ci in ong khamuan hi. Lungdam huai lua hinapi, lungsim khat ah bel ong gen ngam loh om ding hi cih om tei tei lai mawk hi!!

9:06 a.m. in HLL in VLM a na hopih nawn a; “Morning, Pa Mang, Zannittak I:00 am tan a update kamuhdan in chu hotel ah akoih ua, under proper police protection chihdan ahi…tuzingkal thuthak zaakbeh kanei naikei a a om ciah kon update touzeel di”.

9:32 a.m. HLL tawh Pa Biaklun Shoute a na ki ho na uh: “Pa Biak, tuzingkal in SP pa’n hn update nawn a, amau statement bangzah hiam la ding in, thuthak hn omkei leh lunch hunlai lak khawng in kapaisak di uh achi. Amau le kon houpih sakdia akul-apoimoh aneih uhleh hngen in honchia, district boundary tankhawng police escort omtheih nadi daan in ka ngen.” Police escort in Churu Dist boundary tan ong pai uh hi.

Tua khit,10:50 a.m.in VLM in ong SMS in: “Den in HLL in SP a houpih. Ana monitor zel na hi”.

12:35P.M.in HLL in VLL tungtawn in hicibang ong theisak nawn hi: ”Pa Mang, Police teen release process le a panta ua, damin pai khethei le uh kilawm. L.T. Lianzaw pen toh honki housak ua, amau safe ahihdan hon gen. Bt.zaan in mob in hahbawl sim un kigen a, liam-leh-bai dihial chu om tadih lou. District administration in police escort ngetna hon phalsak a, SP in apoimoh dang omleh honggen in hon chia, ana lung himoh kenhonci tuan tuan…hon cooperate mah mah uh chihding hi Pathain panpihna in….”

10:00-12:00 noon, ZCF Fasting Prayer, Vasant Vihar ah kinei in, Topa’n a tate A ma min a thuak tak ding a ong seh ahihmanin, lungdam luangkhi tamkhop kia hi. Damtaka ong tun na ding uh, A va zin te a min mah lo a thumsak, U Lian (officer) ong panpih te min mah lo tek tek a Pasian kiangah thupha ngetsak, Sadarsaher a khut ana kha te teng Zeisu Kris min a ngaihdamna puangin, Topa’n lamdang tak a a lungsim uh ong khel na ding a thungetsak na ki nei hi. Antang thunget zawh in zinte vaidawn ding dan kikupna kinei.

12:15 P.M. in Feli in ong hopih a, “Ong paithei ding ka hita uh. Missionary te nupa(Deepak leh Neelam) te van la ding in a va pai ua, ong tung le uh ka ong kipan khe ding uh. Inn a ong tun khawm vek phot ka sawm uh” ong ci hi. Ken zong Pawlpi in Reception programme kibawlsawm ahih dan ka hilh a, Mizoram house lem thei lo ding ahihmanin Lok Sabha Secretariat Type 5 auditorium, Pa Khai Zou tungtawn a book in, nitak nai 7:00 a kipan ding dan a a na kisawm ahih dan ka theisak hi. Dak 1:15 lak in SadarSaher a pat hong kipan khia uh hi.

8:15 P.M. Reception neihna ding mun,ah damin a gari zat uh Ertiga leh Creta tawh ong tung uh hi. Hall sung ong lut ciangun,mipi in dingkawm in khut beng in ana vaidawn uh a, kipahna khitui luang ziah ziah hi. Mihangsan te zong, vuak leh sat a tuak lai un, kuamah a kap leh khitui luang omlo na pi, hall sung ong tung ciangun, a kidek zo om lo uh a, gualzawh lungnop khitui in a mitte uh tum hi. Praise the Lord!

Reception program hun in Pa Gin Sian Lian Pau in ong makaih a, Tg. Khailun, Nu Ngaihzual leh Nu Puii ten la nuam tak in ong makaih uh hi. “Itna lamdang”cih sa in Nu B.K.Rose in thungetna tawh hun ong hong hi. A thungetma in thu tom cik gen a, “Pasian na kum 30 ka sem ta a, Zeisu min in khat vei bek bet ka thuak nai kei a, I sanggam te hampha ka sa lua”, ci in kahkam tawh ong kiko khia in, mipi lungsim khoih mah mah hi. Mihangsan te pak piakna leh introduction, Chairman ZCF in ong neih a, VLM, Romeo leh Robin te zong kipah etsakna in pak kipia hi. Tua khit ciangin, Mihangsan ten khat khat in report ong pia uh hi. A tuahte uh ong gen ciangin, mihing ngaihsutna ah suahtakna ding om lo hi. A lauhhuai mah mah humpinelkai kulh sung a om tawh tehkak theih in om hi. Ahihang Daniel a kembit pa’n amaute kembit ahih manin, I bitna Suangpi bel Pasian hitak tak hi, cih kician tak in ong musak hi. Pastor Kamzamuan, EBCC,Central Delhi in thapiakna hun ong zang in, Mihangsan te a dingin thungetsakna thupi takin in ong nei in, lungmuan huai mah mah hi. UnauPa, Vumlunmang, Thangzalun,Romeo Hmar leh Bruce Thangkhal ten hun tawm kha kha ong zat khit ciangun, Mission Board member field visit a paikha lo Nu Kimbawi, Pa Lianno Tombing leh Nu Manenching ten khitui/kho-ul nulsakna in towel khat ciat tawh a na vaidawn uh hi. Tua khit in Pa Khakhai in Vote of thanks gen na nei hi. Mipi in “Anglai ah ka pom” cih sa in ZPCS pastor in thumna tawh hun ong khak sak hi.

1st February,2016

Sanggam te tawh dam tak a kimuh nawn ahihmanin, lungdam na lian law mah mah. Khosung mite ngohna Police ten evidence ding a muh loh manun case register thei lo uh a,thu nung thuma omlo ding in ong suakta uh hi.Pasian tung leh I Officer neih te tungah ong panlak pih na hangun lungdamna kam in gen zo lo hi.

1/2/2016 in HLL tawh hicibangin ka kithu zak uh hi:

SZL 2:32 P.M.:”Heutupa, Swan Za Lian,Chairman ZCF Delhi ka hi. Sadarsaher a buaina tawh kisai a na na panlakna te hangin dam in Delhi zannitakin hong tung vek uh hi. Na tungah ka lungdamna uh lian mah mah hi. Topa’n thupha tampi nang leh na inkuanpihte ong pia ta hen”.

HLL replied(2:52 P.M).: “Dam a hongtung theih uhleh kipahhuai e…thank u n godspeed.”

Hih thu a za khempeuh in awlmawh na tawh ong call uh a, thungetna bek hilo a moral support ong pete khempeuh tung a lungdam thu ZCF Delhi tangin kong puak hi. Kuamah a liam sia lua a om kei uh a, Pastor J.K.Lun bil ,Tg. Mangsuan a mit te tarik 1.2.2016 in Nu H.Kikim makaihna in Pa Gin Sian Lian gari tawh Charak Palika Hospital ah va ki check-up sak ua, bangmah serious lo cih medical report ahihmanin, Pasian min phat ni.

I Bitna Suangpi Topa’n thupina tang ta hen!


Featured Posts
Recent Posts
Archive
Search By Tags
No tags yet.
Follow Us
  • Facebook Basic Square
  • Google+ Basic Square

Visit

Free Church, Parliament Street, New Delhi.

 

 Call

Pastor:+919582580095

Chairman:+91-9971311145
  

  • facebook
  • Twitter Clean
  • w-googleplus

Design by

KC Ngaihte

ngaihte.kc@gmail.com